Sonraí an Agallaimh

Ainm:	Gráinne Nic Gairbheith
Áit Chónaithe:	An Cheathrúin, Gort an Choirce, Gort an Choirce, Cloch Cheann Fhaola.
Áit Dúchais:	An Cheathrúin, Gort an Choirce

Dáta

Bailitheoir

sdgsdg

20/03/2006

Dónall Dinny Ó Gallachóir

04/04/2006

Dónall Dinny Ó Gallachóir

**Catagóir: An Ealaín Bhéil**
Fochatagóir	Cur Síos
Logainmneacha	Logainmneacha, míniú ar an ainm 'Ceathrún'. Ceithre pháirt ann. An Chaoldroim Íochtarach, Lár agus Uachtarach. Baile na Creige.
Paidreacha	Urnaí a d’fhoghlaim Gracie ó Mhéabha agus a huncail: Paidir a deir sí i dteach an phobail go háirithe nuair a bhíonn an Sacraimint Rónaofa amuigh ar an altóir: En Ego Féach a Íosa cheannsa rómhilis, Caithim mé fein ar mo ghlúine i d'fhianaise, Agus guím agus achainím ort le mórmhian m’anama, Go ndaingneofá i mo chroí beo, Smaointí creidimh, dóchais agus carthannachta, Agus smaoiním i m’intinn féin agus meabhraím go domhain, Le dianghrá agus le dúbhrón m’anama, Ar do chúig chréachta ró-lúchara, Ag coinneáil i m’intinn na focail úd a chur Dáibhí i do bhéal fá dtaobh díot féin, A Íosa mhaith, do pholl siad mo lámha agus mo chosa, Do thiontaigh siad mo chnámha uilig. Paidir i ndiadh Chomaoineach A Anam Chríost, naomhaigh mé, A Chorp Chríost, slánaigh mé, A Fhuil Chríost, misnigh mé, A Uisce as taobh Chríost, nígh mé, A Pháis Chríost, neartaigh mé, A Íosa mhaith éist liom, I do chréachta folaigh mé, Ná lig dom scarúint leat. Ar an namhaid mhallaithe cosain mé, Ar uair mo bháis glaoigh chugat mé, Agus iarr orm teacht chugat, Ionas leis na Naoimh go molfainn tú, Trí shaol na saol. Aiméan. Lúireach Phádraig Críost liom, Críost Ionam Críost romham, Críost i mo dhiaidh, Críost fúim, Críost os mo chionn, Críost ar mo lámh dheis, Críost ar mo lámh chlé, Críost i mo shuí, Críost i mo luí, Críost i m’éirí, Críost i gcroí achan duine a smaoiníonn orm, Críost i mbéal achan duine a labhras liom, Críost i ngach súil a dhearcas orm, Críost i ngach cluas a chluineas mé. Cinn ghairide: Roimh dul a chodladh: 1. Ó a Dhia creidim go gcaithfidh mé bás a fháil, Níl a fhios agam cén t-am, cén uair, cén áit nó caidé’n dóigh, Ó a Dhia má fhaighim bás le peaca marfach, beidh mé caillte choíche, A chroí Íosa, déan trócaire orm. 2. A Mháistir Nazareth, Íosa, Rí na nIúdach, sábháil mé ar bhás tobann agus gan mé réidh fána choinne. 3. “An codladh é seo a mháthair?” “Chan ea a mhic ach aisling” “Cén aisling é a mháthair?” “Aisling go bhfuil tusa le do spíonadh, le do spóladh, Le do chéasadh, le do strócadh, Le do cheangail leis na cúig rópaí caola, cráife ar bharr na mbeanna arda iúdaí thall, Coróin spíne fá do cheann, Sleamh dóláis fríd do chroí, Do chuid fola ag éirí in airde agus ag titim go trom, Ar leacacha na sráide”. Níl éinne, fir ná mná a deir an urnaí seo trí huaire achan lá, Ní dúil do leacacha ifrinn a fheiceáil anois ná go brách, Ná trí shaol na saol. Aiméan. 4.A Mhaighdean Mhuire, is gile nó an ghrian, A Mháthair Dé gan smál, Coinneal Mhuire agus Flaitheas Dé, Go lasa os cionn m’anam ar uair mo bháis ’s ar mo chrua chás. Amen 5. Tháinig Íosa go bun na croise agus tháinig crith air, D’fhiafraigh na hIúdaigh do, an fiabhras atá ort nó fiabhras creathach, Ní fiabhras atá orm nó fiabhras creathach, Ach is beannaithe an té a deirtheas mo chuid focail, ’S a choinneos i gcuimhne iad. Ní bheidh fiabhras nó fiabhras creathach air anois ná go brách, Ná tré shaol na saol. Amen Sin urnaí in éadan aicíde. An Phaidir Gheal 6. Luímse le Dia agus luíonn Dia liom, Éírímse le Dia agus éiríonn Dia liom, Dhá lá Dé go raibh liom, Bratóg Bhríde fá mo cheann. Sciath Mhíchíl fá mo bhroinn Agus Mac Dé le mo choiméad go maidin. 7. 4 coirnéil ar mo leaba, 4 aingil go raibh ansin, Dia go raibh amuigh fa dtaobh den teach, Dia go raibh istigh fá dtaobh den teach. Dia agus Críost fá dtaobh den leaba agus an teach a mbeidh mé ann go maidin. A Mhaighdean Mhuire, má thagann a dhath orm agus mé i mo chodladh, tar agus muscail mé. Na 4 aingil is sine agus is óige sna flaithis, iad a gharda ar m’anam ar uair mo bháis, i mo chrua chás. Amen. 8.A Mhaighdean Bheannaithe, le do Leanbh Íosa, Tabhair do bheannacht dúinn uilig inniu. Amen. An Memorare (i ndiaidh na pháidrín go minic) Cuimhnigh a Óigh róchráifeach (Mhuire) Nár cluineadh ariamh ó thús an domhain (tsaoil), Nár fágadh gan toradh aon nath a bhí ag iarraidh (dár iarr) do choimirce, Ag impigh do chumhachta, ag tóraíocht idirghuí, Ar an ábhar sin, lán de mhuinín anseo a Mháthair, Impím ort Ór na nÓr, Tigim in do láthair ag osnaigh agus ag urnaí i mo pheacach chráite. A ????? mháthair Mhic Dé, mar a bhí ar a ??????, Éist leo, tabhair cluas daofa go trócaireach. Amen

**Catagóir: An tOsnádúr**
Fochatagóir	Cur Síos
Sióga	Scéal sí faoina hathair mór, Séamus Shíle Mac Fhionnaile, a d’imigh go Contae Aontroma ag cuartú oibre.
Fáinne na Sióg	Scéalta faoi na sióga. Deirtear go bhfuil lios sí fán Bhealtaine. Nuair a bhíodh siad ag damhsa amuigh ar an bhealach mhór sular thosaigh na hallaí damhsa roimhe seo agus thagadh na sióga amach ag damhsa leo fosta. Scéal faoi fhear, Barnaí Bhrianaí, a bhí ag gearradh crann agus iarradh air gan iad a ghearradh, go raibh siad uasal ach níor thug sé aird ar bith orthu. Oíche amháin ina dhiaidh sin, bhris Barnaí a chos.

**Catagóir: An Pobal**
Fochatagóir	Cur Síos
Gaol Sóisialta agus Teaghlaigh	Tógadh Gracie ar an Cheathrún. A teaghlach agus a cuid oibre. Bhíodh sí ag buachailleacht bá agus caorach ar an chnoc mar nach raibh mórán talaimh acu. An chúis leis sin: a garathair mór ag imeacht go hAlbain le hairgead a shaothrú. Fuair sé bás ar an bhealach agus níl siad cinnte cá háit ar cuireadh é. Ní raibh airgead ar bith ag teacht isteach ina dhiaidh sin agus díshealbhaíodh a garmáthair mór ach fágadh cuibhreann aici. Roinneadh an talamh ina dhiaidh sin ach tá sé ar ais ag baill den teaghlach arís, a deirfiúr agus a deartháir.
Cuartaíocht/Airneál	Oícheanta cardála, bhíodh prátaí agus scadáin ann. Bhíodh féasta / tae agus oíche mhór ann. Bhíodh siad ag cardáil agus ansin bhíodh ceol agus damhsa ina dhiaidh. Bhi an saol go breá agus gach duine comhionann.
Spailpíní	Na fir ag imeacht go hAlbain, ag cur anall airgid a choinnigh na daoine beo. D’oibrigh siad go crua. Bhí am crua acu ach bhí na daoine breá ábalta iad féin a choinneáil ag dul, bhí cearca, uibheacha, eallach, bainne, prátaí, tornapaí, cál, meacain, biatais agus oinniúin. Úsáideadh an t-uachtar den bhainne le him tíre a dhéanamh sa chuinneog. Bhí loine agus croca acu. Bhí arán plúir acu agus gruth buí (an chéad bhainne a bhíodh ag an bhó i ndiaidh bhreith na gamhna, bruite). Bhíodh seo roinnte leis na comharsana le cois rudaí eile.
Spailpíní	Bhí Gracie ag iarraidh imeacht go hAlbain agus í óg ach ní raibh go leor cuidithe sa bhaile, bhí a deirfiúr thall, théadh sí anonn le cuidiú lena deirfiúr. Nuair a shocraigh sí féin agus Brianaí pósadh, d’éirigh a huncail tinn. Pósadh sa deireadh iad i nGort an Choirce ag 8.30 ar maidin, 7 Eanáir 1958. A cuimhní ar a lá pósta. In Óstán na Carraige Ruaidh a bhí an féasta acu. D’imigh sí go Béal Feirste ina dhiaidh sin, bhí a deirfiúr ansin. Bhí an chuid is mó den teaghlach tinn ag an am. Bhí drochaimsir ann an oíche sin agus ar feadh seachtainí ina dhiaidh le sneachta, siocán agus gaoth mhór.
Na Scoltacha Náisiúnta	Ag costarnocht an chuid is mó den am. Ní raibh mórán dúile aici sa scoil. Bhíodh eagla uirthi ag dul 'na scoile. Bhí sí i nGort an Choirce ar dtús agus ansin chuaigh sí go Caiseal na gCorr.
Caidreamh Sóisialta	Chónaigh seanbhean dárbh ainm Méabha Pheigí i mbothóg in aice le Gracie nuair a bhí sí ag fás aníos. Díon scraithe a bhí ar an bhothóg a tógadh le clocha agus fóid. Bhí áiteanna le haghaidh fuinneog ann ach ní raibh gloine ar bith iontu, málaí garbha a bhí crochta sa doras agus in áit na bhfuinneog. Bhí gaol breá idir í féin agus teaghlach Ghracie agus chuidíodh siadsan léi lena cuid oibre, rómhar, srl. Bhí eallach aici fosta agus bhíodh siadsan sa teach léi féin, ní raibh tábla, leabaí ná cathaoireacha aici. Luíodh sí ar an urlár, urlár creafóige. Thit sí amach leis an tsagart ach bhí urnaí ghalánta aici. D’fhan sí tamall le teaghlach Ghracie nuair a bhí sí tinn, chóirigh siad leaba di. Scéal faoin uair a raibh sí tinn agus bhí Gracie agus a máthair ag tabhairt cuairte uirthi. Bhíodh na daoine imníoch i rith an gheimhridh go dtiocfadh rud inteacht uirthi, choinníodh siad súil uirthi, bhí an teach thuas sa phortach, píosa measartha ón bhealach mhór. Bhí daoine muinteartha i Leitir Ceanainn aici agus nuair a bhí sí ag fáil bháis, thug siad amach ansin í. Dúirt sí go bhfuair sí siorradh sna súile nuair ab éigean di luí i leabaí sa tseomra ar chúl na tine. Cuireadh í i reilig Ghort an Choirce. Bhí saol fada aici cé nach raibh móran aici.
Obair	Bhí am simplí ann ach bhí saol maith acu. Bhí obair chrua le déanamh acu, ag rómhair mar shampla. Níl rud ar bith curtha anois. Níl mórán ainmhithe ann ach oiread.

**Catagóir: Stairsheanchas**
Fochatagóir	Cur Síos
Díshealbhuithe Áitiúla	Díshealbhú ar an Cheathrún. Cuireadh amach as a dtithe na daoine agus b’éigean daofa imeacht anonn chun na Bealtaine le fanacht i mbothóga beaga.
Imirce	Nuair a bhí siad réidh le himeacht go hAlbain, thit a máthair agus bhris sí cúpla easna, ní raibh siad ábalta imeacht ar feadh tamaill eile. D’imigh siad sa deireadh go 'Falkirk' in 1958 go dtí 1990. Bhain sí sult as a bheith thall. Ba dhoiligh di socrú arís nuair a tháinig sí anall, ní raibh deacrachtaí ar bith ag Brianaí. Ní raibh aithne aici ar dhaoine nuair a tháinig sí anall, chonaic sí athrú mór ar an áit. Níor chaill sí an Ghaeilge ariamh, labhair an bheirt acu Gaeilge thall lena deirfiúr agus le daoine eile a raibh aithne aici orthu. Bhí leisce ar na hÉireannaigh a bheith ag labhairt Gaeilge thall. Bhíodh oíche mhór acu oíche Fhéile Pádraig. Ba ghnách le Gracie arán plúir a dhéanamh daofa uilig. Téann sí anonn agus anall go fóill, tá mac agus deirfiúr aici thall.

**Catagóir: Ceirdeanna agus Cothú an Tí**
Fochatagóir	Cur Síos
Ainmhithe, Beithígh agus Eallach	Ag buachailleacht caorach agus eallaigh thuas sna cnoic. Bhíodh a cuid obair baile le déanamh thuas ansin aici fosta. Bhí leacanna ansin ar a ndúradh an tAifreann. Tá cuid acu ann go fóill. Bhíodh sí ag cuidiú lena deartháir súil a choinneáil ar na caoirigh.

**Catagóir: Lonnú agus Cónaí**
Fochatagóir	Cur Síos
An Teach Cónaithe	Ní raibh leictreachas ar bith acu. Na cineálacha soilse a bhí acu ag an am, lampaí is mó a bhí ann.
An Teach Cónaithe	An teach inar tógadh í, leacacha a bhí ar an urlár. Bhí ceann tuí ar phíosa amháin de. An scéal faoin uair a chur na páistí an teach trí thine. Bhí a hathair mór ar shiúl go hAlbain, b’éigean dó teach eile ceann tuí a thógáil.

**Catagóir: Taisteal agus Gnó**
Fochatagóir	Cur Síos
Aontaí	Ceird na cardála agus na sneá. Choinníodh a máthair cuid den olann ó na caoraigh nuair a bheití a lomadh le sníodh agus le cardáil. Cur síos air sin. Bhí 'frizz' acu. D’úsáid siad tuirne. Bhíodh a máthair ag sníodh agus ag dathú. Rinne siad féin a ndathanna ó bhláthanna agus plandaí m.sh. crotal de na creaga, súile buí agus bláth an aitinn. Dhéanadh sí rollóga móra le cur fríd an tuirne, le cois stocaí agus blaincéid. Thugadh sí an t-ábhar d'fhear darbh ainm Johnny Ó Fearraigh, fíodóir ab ea é. Dhéanadh seisean báinín bán. Dhíoladh siad na hearraí ansin ag Aonach Jack (os comhair Teach Leo).
Scaipeadh Nuachta agus Eolais	Ba iad an chéad teach ar an bhaile a raibh raidió acu. Bhíodh muintir an bhaile ag cruinniú thart gach oíche le héisteacht leis an raidió. A hathair a fuair é thall in Albain.
Aontaí	A hathair ag obair i Mín Doire agus i staisiún Ghaoth Dobhair ag obair ar na ráillí traenach. Bhí sé á dhéanamh sin gach lá. Bhí sé ag obair ansin ar feadh na mblianta. Bhíodh a mháthair ag coinneáil súil ar thurcaithe i rith na bliana. Ag 'Aonach Robinson' ar an Fhál Carach ar an Déardaoin deireanach de mhí na Samhna thugadh sí na turcaithe chun an aonaigh agus dhíoladh sí iad. Choinníodh sí ceann amháin don teaghlach.

**Catagóir: An Duine**
Fochatagóir	Cur Síos
An Óige agus Aois	An saol a bhí ann: Gracie ag iarraidh dul amach chuig na damhsaí den chéad uair. Bhí uncail sa teach léi a bhí iontach maith di agus thugadh siad airgead di. Bhí cuid mhór oibre le déanamh, ní raibh uisce reatha acu, bhí sé le tarraingt aníos ón tobar. Uisce le hól, soithigh a ní, éadach (blaincéid) a ní.

**Catagóir: Cluichí agus Caitheamh Aimsire**
Fochatagóir	Cur Síos
Ceiliúradh agus Caitheamh Aimsire	An cineál Nollag a bhíodh acu, ní raibh mórán bronntanais le fáil. Théadh gach duine chuig faoistin Oíche Nollag agus thugadh na siopaí tae nó siúcra nó bronntanas beag dá gcuid custaiméirí. Siopaí an cheantair.

Theme by Danetsoft and Danang Probo Sayekti inspired by Maksimer