Sonraí an Agallaimh

Ainm:	Séamus Mac Giolla Bhríde
Áit Chónaithe:	Cluain tSaileach, Na Dúnaibh, Na Dúnaibh, Leitir Ceanainn.
Áit Dúchais:	Cluain tSaileach, Na Dúnaibh

Dáta

Bailitheoir

sdgsdg

21/07/2008

Dónall Dinny Ó Gallachóir

08/06/2006

Dónall Dinny Ó Gallachóir

**Catagóir: An Pobal**
Fochatagóir	Cur Síos
Spailpíní	Cuntas maith ar an chéad uair a d’imigh sé go hAlbain ag obair nuair a bhí sé 22 bhliain d’aois. Dhíol sé £2-10 le pasáiste a cheannach. Bhíodh an turas creathnach garbh go minic, bhí an bád a théadh siad trasna as Doire uirthi garbh, bhíodh ainmhithe ar an bhád fosta.
Tiarnaí Talaimh agus Tionóntaí	An Tiarna Liatroma agus an drochíde a thug sé do na tionóntaí. Bhíodh sé ag díshealbhú na ndaoine. Ní duine maith a bhí ann. Chaith sé roinnt ama i Liatroim fosta. Ba as Fanad de na daoine a mharaigh é, bhí triúr fear ann, an lá a scaoil siad é. Níor cúisíodh duine ar bith as cé go raibh barúil ag daoine cé a mharaigh é.
Spailpíní	In Albain a bhí sé féin nuair a d’ól sé ar dtús, théadh siad chuig an damhsa i nGlaschú ar an tram, 3d nó 6d a chosain sé. Ag Wimpey a bhí Séamus ag obair i gcónaí, bhí na conraitheoirí maith go leor le hobair daofa. Thugtaí éadach daofa fá choinne na fearthainne. Ní raibh an pá rómhaith, £8 nó £10 sa tseachtain, bhí lóistín le díol as sin acu, ní bhíodh mórán fágtha acu. Bhí an chuid is mó ag imeacht go hAlbain an t-am sin, bhí fíorbheagán ag dul go Sasana, bhí an obair fairsing san am.
Spailpíní	Fuair sé bus as Glaschú go Govanhill agus fuair sé obair le comhlacht “Wimpey” agus bhí sé sásta an obair a fháil. Bhí cuid mhór tógála ag gabháil i ndiaidh an chogaidh. Ba chomhlacht maith é agus bhí páighe mhaith á díol acu leis na hoibrithe.
Cuartaíocht/Airneál	Théadh siad ag airneáin san oíche agus d'insítí scéalta faoi thaibhsí sna tithe. Bhíodh eagla ar Shéamus ansin. Bhíodh siad ag imirt chártaí sna tithe fosta i rith an gheimhridh.
Spailpíní	Chaith sé seal sa bhaile agus ansin d’imigh sé féin agus a dheartháir Proinsí go Glaschú arís. Fuair siad obair in “Thorny Bank” ag tógáil monarchan. Bhí siad leathuair ar thuras bus amach as Glaschú.
Spailpíní	Chuaigh Séamus lena cholceathar go tuaisceart na hAlban le hobair sna tolláin. In “Inverness” a bhí an tollán agus chaith sé seal maith ag obair ann. B’obair mhaslach, chontúirteach í. Cur síos ar a chuid ama ansin. Ní raibh an obair rómhaith don tsláinte.
Spailpíní	In 1956 d’imigh Séamus agus a chomharsa go Learpholl, Sasana ar lorg oibre. Chuaigh siad as sin go Birmingham. Fostaíodh iad ag stáisiún cumhachta agus d’fhan siad i dteach le deartháir Shéamuis – Proinsí. Bhí Séamus ag tiomáint dumpaire agus bhí sé ag saothrú £25 de phá sa tseachtain.
Obair	Phill sé 'na bhaile tamall agus ansin chuaigh sé go Gloucester tamall ag obair ar feadh 3 bliana i monarcha níolóin. Bhí sé ag obair seacht lá na seachtaine.
Na Scoltacha Náisiúnta	Scoil Míobhuí, an scoil ar fhreastal Séamus féin uirthi, bhíodh an tAifreann sa scoil sa gheimhreadh agus sa tsamhradh bhíodh an tAifreann i dteach an phobail. Bhí scaifte ar an scoil. Bhíodh fód mhóna leis agus é ag dul 'na scoile. Bhí an máistir breá dian. Shiúladh sé 'na scoile is cuma más rud é go raibh drochaimsir ann nó nach raibh. Is iomaí lá a bhíodh sé fliuch agus é ar scoil.
Spailpíní	In 1965/66 phill sé ar Albain agus thosaigh sé ag obair ar na foirgnimh ilstóracha in Paisley le “Wimpey”. Fuair Séamus ardú céime ansin agus rinneadh maor de. Bhí dhá stór agus fiche foirgneamh ansin agus chaith sé cúpla bliain ag obair ansin.
Obair	D’fhág sé an scoil nuair a bhí sé 14 bliana déag. Rinne sé rud beag táilliúireachta ach ansin d’imigh sé go hAlbain nuair a bhí sé 22 bhliain d’aois, bhí sé ag tógáil tithe. Chaith sé ceithre mhí ansin agus tháinig sé 'na bhaile arís. D’imigh sé go Birmingham Shasana ansin in 1956/57. Ag obair i stáisiún cumhachta a bhí sé, bhí go leor Éireannach ann lena chois. Ní raibh a lóistín ró-iontach agus bhí turas fada aige go dtí a chuid oibre ar maidin. Tháinig sé 'na bhaile ansin tamall eile agus ina dhiaidh sin chuaigh sé ar ais go hAlbain. Pósadh sna Gorbals é féin agus a bhean (a fuair bás trí bliana ó shin). Ag obair sna Gorbals (Bridetown) ar fhoirgnimh ilstóracha (22 urlár ar airde) a bhí sé agus in Paisley fosta.
Obair	Phill sé 'na bhaile in 1966 nuair a bhí a athair ag fáil bháis. D'fhan sé sa bhaile ó shin. Thosaigh sé ag coinneáil eallach agus ag déanamh rud beag feirmeoireachta. Níl mórán fán bhaile ag déanamh an obair sin anois. Ní raibh saol simplí acu.
Spailpíní	Tháinig sé 'na bhaile in 1969, ní raibh a athair go maith agus ní raibh sé thall ó shin. Tá athrach mór ar an áit ó shin. Tá daoine muinteartha thall aige go fóill. An t-am sin théadh moll daoine anonn fá choinne an gheimhridh agus thagadh siad 'na bhaile fá choinne an tsamhraidh leis an obair a dhéanamh m.sh. móin, curaíocht. Cur síos ar an am a théadh sé féin go dtí an portach. Bhí bachtaí maithe acu.

**Catagóir: Stairsheanchas**
Fochatagóir	Cur Síos
Stair an Teaghlaigh	Tógadh é féin i gCluain Salach. Thóg a mhuintir an teach ina bhfuil cónaí ar Shéamus. As na Dúnaibh a mháthair, ar an Ard Bhán. Táilliúir ba ae a athair, d’fhoghlaim sé a cheird i bhFanad. Bhí Séamus é féin ag táilliúireacht tamall fosta ach ní raibh dúil aige ann. Bhíodh a athair ag táilliúireacht sa teach sa bhaile. Bhí cúpla táilliúir ar an bhaile uilig, Michael Hughie, Donnachadh Mac Giolla Bhríde, bhí siad uilig breá gnóthach. Cur síos ar an éadach a bhíodh á dhéanadh acu, éadach don iascaireacht fosta.

**Catagóir: Ceirdeanna agus Cothú an Tí**
Fochatagóir	Cur Síos
Iascaireacht	Ag iascaireacht scadán sa gheimhreadh i mba Dhún Fhionnchaidh. Cur síos ar an obair a bhíodh á déanamh acu, ag cartadh amach eangacha.
Móin	Bhí siad ag baint mhóna thuas os cionn an ghleanna in áit a raibh píosa maith ar shiúl uathu. Cur síos ar an turas suas an cnoc agus ar na huirlisí a bhí le hiompar acu. Le linn an chogaidh bhí an Comhairle Contae ag baint mhóna thuas ansin fosta. Bhí an mhóin le tabhairt 'na bhaile le hasail.
Iascaireacht	Nuair a tháinig Séamus 'na bhaile thosaigh sé ag tógáil eallaigh agus caorach. Bhí go leor oibre leo. Bhí féar, coirce, cál, préataí agus tornapaí aige féin. Ní raibh mórán oibre anseo. Níl go fóill, tá go leor acu ag imeacht go Baile Átha Cliath. Níl iascaireacht ar bith ann níos mó ach oiread, bhí iasc acu i gcónaí, bhí bairillí scadán ag achan teach. Cur síos ar an obair a rinne siad ag sailleadh na scadán. Bhí a gcuid glasraí féin ag an chuid is mó de na daoine. Bhí bád ag a lán daoine fosta agus théadh siad amach ag iascaireacht scadán. Bhíodh na mná ag déanamh na hoibre fosta.

**Catagóir: Taisteal agus Gnó**
Fochatagóir	Cur Síos
Scaipeadh Nuachta agus Eolais	I rith am an chogaidh, ní raibh mórán raidiónna ar an bhaile, bhíodh cibé teach a raibh raidió ann lán le daoine ag éisteacht leis an nuacht. Bhí 'court watch' ar an bhaile fosta, bhíodh daoine ag coimhéad amach 'na farraige ar eagla go dtiocfadh báid isteach, tháinig mianaigh i dtír fosta ach phléasc an t-arm iad. Bhíodh adhmad agus a leithéid ag teacht i dtír fosta, thógadh daoine iad agus dhíoladh siad iad cé nach raibh siad in ainm is a bheith a dhéanamh sin.
Báid agus Longa	Bhíodh a athair ag déanamh seolta bád agus á ndíol fosta. Bhí bádchlós taobh leo agus bhíodh seol le déanamh do gach bád, beag nó mór. Cur síos air seo. Bhí saothar maith go leor ag a athair, bhí tréan oibre ann. Bhí sé ag fágáil go leor den éadach i Magees i mBaile Dhún na nGall, théadh sé ar an traein nó chuireadh siad sa phost é. Thógadh Séamus ar a rothar é, ní raibh carranna ar bith ann san am.
Aontaí	Bhíodh Aonach an Chraoslaigh ar an 10ú lá d'achan mhí, bhíodh aonach i mBaile na nGallóglach ar an 23ú de gach mí. Bhíodh daoine ag tabhairt ba agus caorach 'un aonaigh. Bhíodh siúlóid fhada go Baile na nGallóglach, d’fhágadh siad an baile ar an 3 a chlog ar maidin agus ní bhíodh siad i mBaile na nGallóglach go dtí an 11.00 an chlog. Corruair níor dhíol siad rud ar bith agus chaitheadh siad iad a thabhairt 'na bhaile arís.
Iompar Nua-Aimseartha	An chéad ghluaisteán ar an bhaile, Liam Mac Lochlann, múinteoir scoile ba ea é. Beithígh agus carranna a bhíodh acu go dtí sin.

**Catagóir: An Nádúr**
Fochatagóir	Cur Síos
Cnoic agus Sléibhte	Na cnoic, Gaineamh Mór agus Gaineamh Beag. Ba ghnách le neart caorach a bheith ar an chnoc ach níl níos mó, bhí tine mhór air blianta ó shin agus níl mórán maithis ann anois. Bhí bachtaí ann fosta uair amháin. Bhí mianach ann fosta uair amháin.

**Catagóir: An Ealaín Bhéil**
Fochatagóir	Cur Síos
Scéalaíocht	Dúradh go raibh pota óir curtha idir Chnoc Mhíobhuí agus na Cloigneacha, idir “Luí an Mhadaidh agus Suí an Chait”. Deirtear go raibh fear sa cheantar a fuair an pota óir ach níl a fhios ag duine ar bith go cinnte.

**Catagóir: Seanchas Cráifeach**
Fochatagóir	Cur Síos
Colm Cille	Seanchas Cholm Cille – nuair a bhí se ar na Dúnaibh, chuir sé mallacht ar iascairí faoi Dhún Dubháin agus níor tógadh bradán ná scadán ann ó shin. Scéal eile faoi nuair a tháinig Colm Cille na nDúnaibh ar dtús le hasal agus thit an t-asal trí huaire. Tógadh an teach pobail san áit ar thit sí an tríú huair, an áit ina bhfuil seanreilig Mhíobhuí anois.

**Catagóir: Cluichí agus Caitheamh Aimsire**
Fochatagóir	Cur Síos
Damhsa	Caitheamh Aimsire – ag dul go dtí an halla damhsa i gCarraig Áirt, bhí an halla 4 mhíle ar shiúl uathu, shiúladh siad ann, 18d a chosain sé le fáil isteach chuig an damhsa an t-am sin. Ponsoby an t-ainm a bhí ar an fhear a bhíodh ag bualadh ceoil ag an damhsa, bhíodh an damhsa thart ag meán oíche, ní raibh ólachán ar bith ann.

Theme by Danetsoft and Danang Probo Sayekti inspired by Maksimer